احبائى........
ان الحمد لله نحمده و نستغفره و نستعينه و نستهديه وبعد ...
اعلموا اخوانى ان الله عز و جل قد امرنا بشىء بدا فيه بنفسه و ثنى بملائكته فى قدسه و ثلث بخلقه من جنه و انسه فقال تعالى : ( ان الله و ملائكته يصلون على النبي يا أيها الذين آمنوا صلوا عليه و سلموا تسليما ) فصلى الله على نبينا محمد و على أل بيته الأطهار
( يا عم اخلص هى خطبة ) طيب اسف للاطالة , انا عاوز اقول ايه ؟؟ كنت طول عمرى بادخل منتديات و اسجل و اخد الحاجة الى انا عاوزها و امشى و محدش يشوف وشى تانى فى المنتدى, و ممكن ما كنتش اسجل اصلا لو الرابط بيظهر من غير تسجيل .
لحد ما جتلى دعوة من الاخ الادمن بتاع المنتدى ده و قلت لنفسه ياض سجل و اهو كله بثوابه وفعلا سجلت فى المنتدى و انا الان اسير المنتدى زى ما انتم شايفن , السؤال بقى ... ليه نسجل و ليه نشارك بمواضيع فى المنتدى ؟؟؟
نتكلم عن التسجيل الاول , اولا لازم تسجل لسببين , الاول عشان تتمكن من انك ترفع المواضيع الى انت عاوز ترفعها على المنتدى ده لو كنت حابب تبقى عضو نشط ( على الرغم من انك لو رفعت 2545325566 موضوع بتفضل برده عضو جديد , و الله يا جماعة اسمى مش جديد , برده مافيش فايدة انت عضو جديد , ما علينا ) تانى سبب لو مش عاوز تشارك بمواضيع و تفضل برده عضو جديد, برده هتسجل عشان الروابط تظهر و ده حق الناس الى رافعة حاجة انك تسجل فى المنتدى بتاعها و ان المنتدى يعلى كدة و يزدهر ( و اهو كله فى جيب الادمن هههههههه ...باهزر هاا ) متفقين على التسجيل خلاص ؟؟؟
نيجى لرفع المواضيع , و الله يا شباب ده موضوع على بساطته الا انه مفيد جدا و ثوابه جامد جدا , تخيل ان حضرتك رافع حاجة على المنتدى و قاعد فى بيتكم و قافل الجهاز و مأنتخ و بتشرب كباية شاى بلبن تحت البطانية فى ليلة مطيرة , و الناس قاعدة تنزل الحاجة بتاعتك و عداد الحسنات شغال ( اللهم لا حسد و لكن حقد و ضغينة ) اظن ان النقطة دى واضحة للكل و احسب ان كل الناس هنا نيتها الخير و الثواب ان شاء الله ... اللهم تقبل و بارك فى القليل ... امين .
نقطة أخيرة, نشر المنتدى بين الناس , زى ما حضراتكم شايفين المنتدى لسة شاب فتى , و معمول فيه شغل طيب و جميل و الله , فحاول بقدر الامكان نشر العنوان بتاعه على اكبر قدر من اصدقائك , و لو فى اى فكرة للدعاية يا ريت الناس تقترحها على المنتدى فى اى مكان و هنوصلها ان شاء الله و فى منتدى للاقتراحات ( تمام يا باشا الى تحت على ايدك اليمين ده , الله ينور عليك ) .
نقطة أخيرة ( يا كداب ما انت قلت نقطة اخيرة فوق ) معلش الزهايمر يا شباب, بس اكيد ان شاء الله دى اخر نقطة , الردود , يا ريت لو حد استفاد من لينك او عجبه اى موضوع يرد برد و لو بسيط على صاحب الموضوع , ليه؟؟؟؟ لسببين برده , تشجيع الى رافع الموضوع و نخليه يرفع تانى مواضيع افضل ان شاء الله ده اولا , ثانيا عشان يعرف هل الموضوع عاجب الناس ولا ما يرفعش حاجة زى كدة تانى ...بس انا خلصت .
اسف جدا جدا جدا .......الخ على الاطالة و التطويل و طول الى انا كاتبه بس و الله كلام من القلب لكل الاخوة فى المنتدى و الى لقاء ان شاء الله
بالنسبة ل ( هههههههه) الى معناها ضحكة انا مش عارف ليه هههههه ؟؟؟ بالله عليكم حد لما يضحك بيطلع صوت كدة هههههههه؟ طبعا لا , مش عارف و الله راحت فين هاهاهاها او هع هع هع يلا الدنيا اتقلت بركتها ....ما علينا
صدعتكم و غلست عليكم جدا اسف و مش هتشوفوا وشى تانى ....قصدى مش هتشوفوا المقالات الرخمة دى تانى ...الا فى منتديات العام ,التعارف,الحديث,الفقه,السياسة,الرياضة,الكمبيوتر... ...الخ هع هع هع هع.....الخ .
يلا السلام عليكم و رحمة الله و بركاته ... لا تنسونا من صالح الدعاء.
ما كان من توفيق فمن الله وحده و ما كان من خطأ فمنى و من الشيطان ...نسال الله العفو... امين
الأربعاء أكتوبر 19, 2011 2:03 pm من طرف اسماء
» إيقاظ الإيمان .. كيف ؟
الإثنين أكتوبر 17, 2011 1:26 pm من طرف المشتاقة الي الجنة
» دموع الصومال
الإثنين أكتوبر 17, 2011 1:13 pm من طرف المشتاقة الي الجنة
» الرسول صلى الله عليه وسلم والصومال
الإثنين أكتوبر 17, 2011 1:05 pm من طرف المشتاقة الي الجنة
» هنا من موقع التوبة أعلنها توبة لله
السبت أكتوبر 15, 2011 4:21 am من طرف اسماء
» قصة طفل عمره 3 سنوات والله المستعان
الجمعة أكتوبر 14, 2011 10:15 am من طرف اسماء
» فوائد الصرصور..اخر زمنـ صار لهمـ فوائد بعد..
الخميس أكتوبر 13, 2011 12:40 pm من طرف المشتاقة الي الجنة
» ذابت قلوبنا من هم الدنيا
الخميس أكتوبر 13, 2011 12:36 pm من طرف المشتاقة الي الجنة
» لا تجعل الله أهون الناظرين إليك [ ذنوب الخلوات ]..!!!
الخميس أكتوبر 13, 2011 12:23 pm من طرف المشتاقة الي الجنة